ՀՀ դեսպան Վահագն Աֆյանը ելույթով հանդես է եկել «Միկրո, փոքր և միջին ձեռնարկությունների կապ. գլոբալ աճի ֆորում 2025» խորագրով միջոցառմանը

27 հունիսի, 2025

Հնդկաստանում ՀՀ դեսպան Վահագն Աֆյանը ելույթով հանդես է եկել «Միկրո, փոքր և միջին ձեռնարկությունների կապ. գլոբալ աճի ֆորում 2025» խորագրով միջոցառմանը:

Հնդկական գործարար շրջանակներին ուղղված իր խոսքում դեսպան Վ. Աֆյանը, անդրադառնալով համաշխարհային տնտեսական արագ ընթացող զարգացումներին և պահանջված առավել խորը գործընկերությունների հաստատմանն ու համագործակցության նորարարություններին, բարձր է գնահատել հայ-հնդկական դինամիկ զարգացող հարաբերություններն ու վերջին շրջանում բազմակողմանի ներգրավվածությամբ ռազմավարականին ձգտող երկկողմ գործընկերությունը:

Անդրադառնալով Հայաստանի տնտեսական աճ արձանագրող ցուցանիշներին՝ ՀՀ դեսպանը քաջալերել է ներկաներին, համատեղ արտադրությունների հիմնման նպատակով, առավել ակտիվ փոխգործակցություն իրականացնել «Enterprise Armenia» Ներդրումների աջակցման կենտրոնի հետ՝ դիտարկելով տեղեկատվական տեխնոլոգիաների, գյուղատնտեսության, դեղագործության, վերականգնվող էներգետիկայի, տեքստիլ արդյունաբերության և զբոսաշրջության բնագավառների ներդրումային հնարավորությունները։

Ընդգծվել է Հնդկաստանի և Հայաստանի միջև ուղիղ ավիաթռիչքների գործարկման կարևորությունը բիզնես կապերի աշխուժացման և շարժունակության ապահովման տեսանկյունից: Այս համատեքստում առանձնանշվել է նաև Հնդկաստանի հետ լոգիստիկ կապի հաստատման հրամայականի մասին՝ անդրադարձ կատարելով ՀՀ կառավարության կողմից մշակված «Խաղաղության խաչմերուկ» նախաձեռնությանը։

Դեսպան Վ. Աֆյանն ամփոփել է. «Մենք պատկերացնում ենք Հայաստանը որպես առևտրային և տարանցիկ կամուրջ՝ ոչ միայն աշխարհագրական, այլև ռազմավարական առումով այն հնդկական փոքր և միջին ձեռնարկությունների համար, որոնք ձգտում են ընդլայնվել նոր տարածաշրջանային շուկաներում»։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր